ازاي تشجع نفسك عشان تروح الجيم كمال اجسام gym

جيم,تمرين,شجع,ازاي,اعرف,كمال,اجسام,حديد,جدول,برنامج,طريقة,كسل,تروح,تغذية,نفسي,عامل,اوزان

طبعا الكسل ده اهم حاجة في حياتنا و كمال الاجسام مينفعش فيه كسل يعني عندك تمرين النهاردة لازم تروح و تلتزم مش تقول "يا عم بكرة بقي" لا طبعا يوم التمرين يبقي تمرين و يوم الراحة يبقي راحة بس العامل النفسي ممكن يتغلب علينا برده في الاخر 

دي طرق عشان تقدر تتغلب علي الكسل و تشجع نفسك تروح الجيم و التمرين بتاعك

1- تخيل انك بتحاول تتغلب على منافس ليك

تخيل ان في واحد منافس ليك في التمرين و الشخص ده غايظك اوي و كمان جسمه اكبر و احسن منك ده هيخليك تتمرن علطول بقوة عشان تتغلب عليه 

2- تخيل ان الاوزان هي عدوك اللي وقع تحت ايدك

تخيل انك بتتخانق مع واحد و الشخص ده وقع تحت ايدك هتعمل ايه؟ اكيد هتضربة و تشيله و تهبده, تخيل ان البار او الدامبلز هو الشخص ده و كل ما تخلص على شخص صغير " وزن صغير" يجيلك واحد اكبر منه عشان تضربه و هكذا

3- كافئ نفسك لما تتمرن كويس

و ده مش انك تفتح في الاكل او تقلة التمرين بتاع بكرة , لا طبعا, انت ممكن تخرج تتعشي برة بس يكون اكل صحي او تشتري جلوفز او تيشيرت جديد تتمرن بيه او حتى ابسط حاجة تهني نفسك او تصقف لنفسك

4- كل أكل مختلف النهاردة

و ده عشان متزهقش من نظام الاكل بتاعك يعني بدل ما كل يوم تونة تونة خليها يوم تونة و يوم صدور فراخ و يوم لحمة حمرا

5- جرب مكمل جديد

بدل ما انت بتستعمل واي بروتين مثلا, الشهر ده جرب كرياتين او امينو و شوف الفرق في الاخر

6- اتفرج على فيلم لبطلك المفضل

كل واحد فينا ليه بطل مفضل هو مثله الاعلى زي ارنولد, سيلفيستر او فان دام و انت لما تشوفهم دي حاجة تشجعك انك تتمرن عشان تكون زيهم

7- اعمل لنفسك اهداف صغيرة

يعني مثلا تقول انا الاسبوع ده عايز اخس 2 كيلو او في اسبوعين دراعي يزيد بمقدار معين و لازم تكون اهداف منطقية و معقولة مش مثلا تقول انا عايز اخس الاسبوع ده 20 كيلو

8- اسمع المزيكا اللي بتحبها

و انت في الجيم اسمع المزيكا اللي انت بتحبها " عالموبايل او ام بي ثري مثلا" و دي هتنسيك التعب اللي في التمرين

9- خدلك اسبوع راحة

بعد شهرين او تلاتة مثلا خدلك اسبوع متنزلش فيه الجيم و مترفعش فيه حديد خالص بس تفضل مزبط اكلك و ده هيخلي ذهنك يصفي و يخلي الجيم يوحشك فتنزل بعديها كلك حماس للتمرين

10- اتمرن علشان صحتك

حط في دماغك ان تمرينك ده هيخلي صحتك تمام لما تكبر و ميجلكش امراض الزهايمر و لا هشاشة العظام و لا تمشي على عكاز و تفضل تتمتع بصحتك طول حياتك

11- اتمرن عشان في حد قال انك متقدرش 

واحد صاحبك مثلا او اي حد تعرفة قالك ان انت متقدرش تكمل او هتقطع بعد شهر او عمرك ما هتعرف تحقق حاجة, اتمرن بكل جهدك عشان تثبتله انو كان غلطان

12- اتمرن عشان انت عايز تتمرن

اتمرن عشان دي رغبتك و انت لازم تحققها

13- خلي معاك زميل في التمرين

زميلك في التمرين اكتر حاجة ممكن تشجعك لانو هايسند معاك و لما يكون فاضلك عدة او حاجة هيشجعك عشان تخلصها و دايما هيكون في تنافس بينكم

14- خلي اللعبة في دماغك 

اقرا كتير عت اللعبة, اسال الكباتن عن معلومات, اتكل مع اصحابك عن اخر اخبار اللعبة و بكدة تبقى اللعبة و التمرين شئ بديهي في حياتك

15- حاول تبهر الناس

حاول تبهر اهلك او اصحابك او خطيبتك و طول ما انت حاطط الفكرة دي في دماغك طول ما انت هتفضل تتمرن بقوة عشان تحقق الهدف ده

16- الصور

علق صور ابطالك المفضلين في اوضتك او خلفية لجهازك و كمان صور نفسك كل فترة و قارن صورك الجديدة بالقديمة و شوف التقدم اللي انت حققته

17- ساعد الاخرين

لما حد ييجي يسألك في حاجة في التمرين ساعده, مجر ان حد ييجي يسألك ده لانو هو شايف انك فورمة حلوة و ده اكيد يخليك متحمس للتمرين و مبسوط باللي انت حققته

18- غير نظام تمرينك

غير نظام تمرينك كل فتره علشان متحسش بالملل من تكرار نفس الروتين كل يوم و كمان عشان العضلة متتعودش عليه و تقل استفادتك من التمرين

19- حب اللعبة

حب اللعة مش لازم تروح الجيم متكدر كل يوم و مترحش الجيم لو انت مكتئب عشان ده هيكرهك في التمرين

20- قارن نفسك بلاعبين اخرين

شوف حد احسن منك سواء في الجيم او في المجلات و النت و حاول انك توصله و تكون احسن منه

21- روح الجيم و خلاص

تعليقك يهمنا